„Þetta er svo mikið strákaveldi“ : innsýn í kynjaheima dægurtónlistar á Íslandi

Ritgerð þessi var unnin með það fyrir augum að skoða dægurtónlistariðnaðinn með hliðsjón af kynhlutverkum. Markmiðið var að varpa ljósi á hvers vegna konur eru í miklum minnihluta í tónlistargeiranum á Íslandi. Tónlistariðnaðurinn er stór hluti af menningu okkar og því mikilvægt að kanna hvers vegna konur standa höllum fæti á þessu sviði. Verkefnið byggist á eigindlegri rannsókn. Annars vegar var gögnum safnað í gegnum eigindleg viðtöl við þrjár tónlistarkonur sem eiga sameiginlegt að hafa verið virkir þátttakendur í íslensku tónlistarlífi og var sjónum beint að bakgrunni þeirra, menntun, reynslu og viðhorfi til tónlistargeirans. Hins vegar var gagnaöflun fólgin í samantekt á tónlistarumfjöllun í fjölmiðlum. Niðurstöður gefa til kynna að formgerðir samfélagsins og ráðandi hugmyndir um kvenleika og karlmennsku takmarki möguleika kvenna í tónlistargeiranum. Konur eiga erfitt uppdráttar á mörgum sviðum tónlistargeirans, sem hefur alla tíð verið karllægur, vegna ríkjandi hugmynda samfélagsins um hlutverk kynjanna. Þá kom í ljós að umfjöllun um dægurtónlist í fjölmiðlum á Íslandi er nánast alfarið í höndum karla